唔好以為唔使轉波，就係最容易合格

報名考電單車之前，唔少同學已經心大心細。
仲以為考自動波就係最容易合格？呢個其實係電單車路試最大誤解。究竟揀完有冇得轉、邊樣容易啲？等輝Sir同你分析自動波同棍波嘅分別，幫你揀最適合嘅課程。

🎥 輝Sir親身講解：自動波定棍波點揀？

其實咩係棍波同自動波？

棍波又叫「手動變速器」，指要司機人手控制極力子變速嘅波箱，即係駕駛嘅時候要因應唔同情況選擇適當嘅波段；而自動波電單車一般係用CVT（無段自動變速器），雖然都係自動波，但又同一般私家車嘅會自動轉波嘅波箱略有分別。

電單車棍波 vs 自動波：一表睇清

斜路打8字：自動波同棍波有咩分別？

【輝Sir冷知識】斜路打8字，其實無須轉波。棍波同自動波嘅關鍵唔係波箱，而係車身結構；好多同學以為自動波較易，在打8字的情況下棍波反而較易操控。

1.棍波車（例如GN125、小熊ZS150）用鐵鏈傳動，反應較快，打8字油門控制較靈活；而自動波多數用皮帶傳動，反應略有延遲，打8字就無咁靈敏。

2. 棍波車亦相對容易平衡。你可以夾住棍波車油缸，有助穩住身體，同時架車亦唔會左搖右擺；自動波車就無呢個優勢，一般無經驗嘅學員都會相對唔穩定。

3. 值得留意，自動波因為車型結構關係，喺低速微調同甩腳穩定方面都無棍波咁靈活，所以做斜路打8字會比棍波難操控。可以咁講：學自動波係「先甜後苦」——強制班容易，去到路面因為要打斜路8字先開始辛苦；學棍波就啱啱相反，係「先苦後甜」——強制班難啲，但將來斜路打8字反而輕鬆好多。

牌照分別、車種選擇

同私家車一樣，電單車棍波合格就可以揸埋自動波，而考完自動波牌想揸棍波，就要重新報考棍波課程。亦因為咁，考完棍波牌基本上揸得曬各類電單車，選擇闊得多，完勝自動波牌。值得留意嘅係， 綿羊仔（Scooter）唔一定係自動波，例如部分偉士（Vespa）經典嘅綿羊仔都係棍波。你永遠唔知自己日後買車、換車、旅行會想揸咩車，所以棍波就著數得多！

【輝Sir冷知識】反過嚟講，都唔好以為自動波淨係綿羊仔—— QJMOTOR 出咗部 SRK 500 RA，係有型嘅 fairing 跑車款，但用全自動（AMT）波箱，仲可以撥掣半自動轉檔，同 Honda DCT、BMW 鬥。所以型唔型同波箱類型無關。

考試邊樣容易啲?

考試唔只考轉波。按輝Sir過往教學觀察，慢速平衡、視線、油門控制、手腳配合同臨場表現先係關鍵；棍波學員熟習基本操作之後，考試難度未必比自動波高。

電單車路面考試

路面駕駛方面，自動波非常簡便直接，省卻轉波一系列嘅步驟，減少死火、轉錯波嘅機會，尤其係塞車嘅時候更顯方便；而棍波由於有得夾住油缸，就更易平衡，無咁容易落腳（失平衡）。不過只要通過練習，以上嘅困難都可以克服。

報咗名自動波仲可唔可以轉棍波？

1.如果係強制堂，報名之後先決定要轉，不論係自動波轉棍波定棍波轉自動波，咁你就要俾一定嘅手續費喇。

自動波學員發現棍波嘅優勢之後，唔少都會想轉去學棍波；亦有學員覺得棍波難，想轉返去自動波。報咗名（甚至已經上緊堂），其實你都仲有機會轉，不過學到某啲階段就需要手續費喇。

2. 如果已通過自動波強制試，而之後想改用棍波應考，運輸署將電單車個案列作需要先查詢嘅安排。唔好單靠「路試只可以考自動波」或「一定要重考棍波強制試」作決定；應先向駕駛考試排期事務處確認。

3. 如果已通過棍波強制試，之後想喺路試轉用自動波，實際應考安排同最終牌照限制要先向駕駛考試排期事務處確認，唔應假設任何情況都一定無須手續費。

如果仲係未揀定，不妨考咗棍波強制試先，難度唔高之餘，亦俾自己之後有得選擇，隨時轉都無問題。

老實講，唔少人考完自動波，日後想揸多啲款式先發現要補考棍波，白白多花咗時間同錢。想避免走冤枉路，一開始就考棍波（一雞兩味）通常最抵。（轉考、牌照嘅實際安排，以 運輸署 最新公布為準。）

🎥 最後決定前必睇影片

總結

如果你問輝Sir意見，輝Sir就點都推介你考棍波牌。（嗱，自動波同棍波一樣價錢，唔係想賺多你幾舊呀）日後車種嘅選擇、彈性都比較大，而考試嘅容易程度又相若，棍波似乎點都著數啲。唔少人學完仲愛上棍波添！

每個人需要唔同。如果你仲心思思應該學邊樣，可以去 https://faisirmotorbike.com/online-enquiry/ 留低資料，搵輝Sir團隊按你嘅情況解答疑問。